ជ័យទត្ត តចប់ ខែ តុលា 6, 2008
Posted by រដ្ឋ in ដំណឹងផ្សេងៗ, ពីនេះពីនោះ, អំពីស្រុកខ្មែរ.trackback
ហេតុមិនសូវល្អែងសរសេរ ច្នោះហើយបានជានិទានដាច់ជាកំណាត់ៗ ។ ថ្ងៃនេះបញ្ចប់រឿងបន្តិចតពីម្សិល ប្រិយមិត្រគួរអានប្រកាស ទស្សនីយភាពល្ខោន សិនបានយល់ដំណើររឿងគ្រានេះបាន ។
… ពាក់កណ្ដាលអាធ្រាត្រស្ដេចជ័យទត្តបានមកដល់ដំណាក់របស់ព្រះនាង វរចន្ទ ហើយក៏ស្រែកហៅរកនាងស្រីសិតា ។ ឮសំឡេងដឹងថាជ័យទត្តមកដល់ ភីលៀងក៏បើទ្វារយាងអង្គជ័យទត្តចូល [...] ។ ឃើញស្រស់ស្រីទងវងកំពុងលង់ក្នុងដំណេកយ៉ាងក្សេមក្សាន្ត បុរសយើងចូលត្រកងបី ដឹងដល់ស្រីឲ្យប្រែភ្ញាក់ដឹងប្រាណ!! ឃើញភ្លាមស្នេហ៍ភ្លែត ចិត្តស្នេហ៍កំពុងតែឆាបឆួលពេញប្រាណ ជ័យទត្តសុំក្ដីស្នេហា តែបែរកន្និដ្ឋាប្រកែកថា ទេ ។ បុរសស្ត្រីមួយគូនេះ ផ្លែផ្កាសំដីឌឺដងទៅមកក្នុងកណ្ដាលរាត្រីស្ងាត់ជ្រងំ តើនរណាអាចទប់ចិន្តាស្រីបាន បើក្សត្រាអង្គនេះសម្រស់សង្ហាវាចាមានមន្តយ៉ាងនេះ ។ …
នាងស្រីសិតារត់យ៉ាងហបហត់ ហើយប្រាប់ថារឿងនេះជ្រាបដល់ក្រុងអសុរីបិតាព្រះនាងហើយ ។ វរចន្ទភ័យណាស់ បើដឹងដល់បិតាហើយខ្លួនមុខជាក្ស័យសង្ខារមិនខាន ក៏បបួលជ័យទត្តថ្លើមថ្លៃរត់ឲ្យឆ្ងាយពីនគរនេះថ្វី ។ គិតហើយទាំងបីអង្គា ពង្រត់គ្នាយ៉ាងប្រញាប់ប្រញាល់ ។ ខកការអាសារបង់ ស្ដេចយក្សនិងមហេសីតាមទាន់ដំណើរអ្នកទាំងបី ។ សិន្ទ្រាទ្រង់ខ្ញាល់ខ្លាំងណាស់ ជេរស្ដីប្រទេចនាងកូនអប្រិយ ហ៊ានលួចលាក់ស្នេហ៍ហឺតស្នេហ៍ហៃនិងមនុស្សប្រុសជាតិជាមនុស្សាច្នោះ ។ ទាំងទ្វេហារតាំងទទូចអង្វរដល់ព្រះបិតាមេត្តាប្រណីដល់បុត្រផង ។ មិនបានការឡើយ ក៏តាំងអង្វរព្រះមាតាឲ្យជួយ អង្វរបិតាផង ។ សិន្ទ្រាក៏ស្ដីថាទាំងនាងមាតាអប្រិយចិញ្ចឹមកូនមិនល្អទៅវិញ ។ ទាល់តម្រិះទាំងអស់គ្នា មិនដឹងធ្វើយ៉ាងណាមានតែទុក្ខសោក ព្រោះរាជអសុរីមិនប្រណីសោះឡើយ ។ តែទោះជាយ៉ាងណាដោយឃើញទើសភ្នែក នឹងរឿងជ្រុលហួសជួសដំណើរច្នោះ សិន្ទ្រាកើតក្ដីអាណិតអាសូរឡើងព្រោះតែកាត់ទឹកមិនដាច់កាត់សាច់មិនបាន ។ ឪពុកក៏សន្តោសបុត្រាបុត្រី អនុញ្ញាតឲ្យចូលព្រះនគរ នឹងរៀបចំពិធីអភិសេកមង្គលការទៅតាមប្រវេណី ។
ថ្លែងពីបុទុម្ពរ ដែលត្រូវជាប់ឃុំក្នុងគុហានៅឯនគរក្រុងគ្រុឌវិញម្ដង ។ ធីតាកើតទុក្ខសោកសង្រែងរៀងរាល់ថ្ងៃ រង់ចាំថ្ងៃព្រះស្វាមីមកជួយ ។ … កាលអើយកាលនោះណា ជាគ្រាដែលជ័យទត្ត និងយក្សកន្ធាត់ក៏មកដល់នគរក្រុងគ្រុឌហើយ ដើម្បីមកជួយធីតាម្ចាស់ថ្លើមថ្លៃ ។ ទ្រង់បានរំដោះបុទុម្ពរពីគុហាបានហើយ តែគ្រុឌមកដល់កើតក្ដីខឹងសម្បា តាំងតប្រយុទ្ធឈ្នះចាញ់ជាមួយអង្គជ័យទត្ត ។ ប្រយុទ្ធគ្នាយូរទៅ គ្រុឌថមថយកម្លាំង គិតថាបើតតាំងបន្តទៀតមុខជាចាញ់មនុស្សាមិនខាន ក៏សូត្រមន្តវិជ្ជាការបណ្ដាលហៅមិត្រសម្លាញ់ ពីរនាក់មកទៀតឲ្យជួយខ្លួន ។ ក្នុងនោះមានម្នាក់ជាសិន្ទ្រា ។ សិន្ទ្រាមកដល់ភ្លាម យល់ជាគ្រុឌកំពុងតតាំងជាមួយបុត្រសុណិសារបស់ខ្លួន ក៏ប្រាប់ឲ្យបញ្ឈប់សង្គ្រាមភ្លាម ។ កាលបើឃើញបិតាក្មេក ជ័យទត្តចូលក្រាបថ្វាយបង្គំ ហើយណែនាំ បុទុម្ពរចៅតាមុនីឥសី និងរៀបរាប់រឿងហេតុដើមទងទាំងឡាយដែលកើតឡើងកន្លងមក ។ សន្តិក៏កើតឡើងគ្រានោះ ពួកគេចែកដំណើរទៅកាន់ឋានលំនៅតែរៀងខ្លួនបានក្សាន្តតទៅហោង ៚
ការសម្ដែងចប់ត្រឹមនេះឯង ។ ទស្សនិកជនពេញរោងមហោស្រពទះដៃសម្ដែងសាទរដល់សិល្បករខ្មែរយើង ។ នៅថ្ងៃអង្គារទី៧ ការសម្ដែងអាយ៉ៃរឿង ស្រីកញ្ជើធ្លុះ ជាការដំឡើងលើកដំបូងផងដែររបស់លោកគ្រូ ជិន នាគ ដោយដកស្រង់ចេញពីរឿងព្រេងខ្មែរ “ មាយើង” ។ ប្រធានរៀបចំកម្មវិធីអំពាវនាវឲ្យទស្សនិកជនទៅទស្សនាឲ្យបានច្រើនកុះករ ។ *សម្រាប់អ្នកនៅតាមគេហដ្ឋានអាចទស្សនាតាមកញ្ចក់ទូរទស្សន៍អប្សរា ។
ឃើញមនុស្សកកកុញអីចឹង នឹកឃើញកាលនៅស្រុកនៅឡើយ ខ្ញុំតែងតែទៅ ស្ម័គ្រចិត្តធ្វើជា usher អោយអង្គការ Amerita រាល់ពេលមានកម្មវិធីសំដែង ។ ពិតមែនតែហត់បន្តិច ប៉ុន្តែសប្បាយចិត្តនឹងឃើញបងប្អូនយើងមកលើកទឹកចិត្តដល់សិល្បករ សិល្បការិនី ។ រាល់ការសម្តែងម្តងៗ ណែនរោងរកតែកន្លែងអង្គុយមិនបានផង ។
មែនហើយបងច្រី ខ្ញុំក៏សង្កេតឃើញច្នោះដែរ ឲ្យតែមានសម្ដែងអី សម្បូណ៌មនុស្សទៅមើលណាស់ឥឡូវ ព្រោះកម្របានមើលម្ដងៗ ។ និយាយពីអម្រិតា ខាងគេមានកម្មវិធីច្រើនណាស់ សឹងតែរាល់ខែតែងមានការសម្ដែងអ្វីមួយ ។